Миржалол Қосимов: "Тайёргарлик жараёнининг муҳим босқичидамиз..."
Чехиянинг номдор ва совриндор жамоаси “Баник Острава” клубига қарши кечган ўртоқлик учрашувидан сўнг “Бунёдкор” бош мураббийи Миржалол Қосимовнинг фикрлари билан қизиқдик.
- Ҳозирги кунда мавсумолди машғулотларимиз қизғин палласига кирган. Аниқроқ қилиб айтадиган бўлсам, ҳозир тайёргарлик жараёнининг муҳим босқичидамиз. Баъзи бир чизиқларни маҳоратли легионерлар билан тўлдирмоқчимиз. Шунинг учун ҳам кўригимизда бир қатор хорижлик футболчилар иштирок этишмоқда. Уларга қўяётган талабимиз шуки, маҳаллий ўйинчилардан бир бош устун бўлиб, жамоамиз ўйинини кучайтиришлари керак. Шунингдек, легионерлар ўз ортларидан ёшларни эргаштиришлари ва шу орқали ўзбек футболига фойда келтиришлари лозим. Умуман олганда, легионер футболчи маҳаллий ўйинчилардан яққол ажралиб туриши керак.
Бугун икки хил таркибни майдонга тушириб, ихтиёримизда бўлган деярли барча ўйинчиларни текшириб олдим. Шавкат Саломов, Анвар Ражабов ва Баҳодир Пардаевнинг имкониятларини яхши билганим учун бу учликка бошқа топшириқ бердим ва улар индвидуал машқлар бажаришди. Дилшод Жўраевда кичик жароҳат борлиги учун уни бугун майдонга туширганим йўқ.
Чехия жамоаси бизга яхшигина спарринг рақиб бўлди. Ушбу ўйиннинг фойдали томонлари кўп. Чехлар билан ўйинда кўригимизда бўлиб турган футболчиларни маҳоратларини синовдан ўтказиб олдик. Шунингдек, ўзимизнинг кучли ва кучсиз томонларимизни яна бир бор текшириб, тактик режаларимизни синаб олдик, - деди Миржалол Қўшоқович.
