"Шўртан" юртимизга қайтиб келди
Янги чемпионатга жиддий тайёргарлик кўраётган Ғузорнинг “Шўртан” клуби 19 январ Бирлашган Араб Амирликларининг Дубай шаҳрига учиб кетганлиги ҳақида хабар бергандик.
Икки ҳафта мобайнида Дубай шаҳрида жойлашган “SAMAYA” меҳмонхонасида истиқомат қилган Игорь Криушенко шогирдлари йиғин мобайнида тўртта ўртоқлик учрашувини ўтказишди.
Маҳаллий “Аджман” клубига 1:2 ҳисобида имконият бой берилганидан сўнг, кейинги ўртоқлик баҳсида “Зенит” клуби 2:1 ҳисобида мағлуб этилди. Сўнгра БААнинг аралаш таркиби билан баҳс олиб борилди ва 1:2 ҳисобида мағлубиятга учралгач, сўнгги ўртоқлик учрашувида “Далянь Шидэ” клуби рақиблик қилди ва Хитойликлар 2:0 ҳисобида мағлубиятга учради.
Кеча Тошкент вақти билан соат 17:30 Ғузорнинг “Шўртан” клуби футболчилари Дубай-Тошкент йўналиги бўйича Дубай шаҳридан мамлакатимизга қайтиб келишди.
Игорь Криушенко ўз шогирдларига 9 февралгача дам берди. Айнан 9 феврал куни “Шўртан” футболчилари пойтахтимиздаги “Ўзбекистон” меҳмонхонасига йиғилади ва 13 феврал куни Туркиянинг Анталия шаҳрига учиб кетишади.
***
Сайтимиз орқали хабар берганимиздек, Бирлашган Араб Амирликларининг Дубай шаҳрида бошланажак мавсумга жиддий тайёргарлик кўраётган Ғузорнинг “Шўртан” клуби йиғин давомидаги сўнгги ўртоқлик учрашувини ўтказди.
Хитойнинг “Далянь Шидэ” клубига қарши чиққан Игорь Криушенко шогирдлари ғалаба қозонишди. “Шўртан” учрашувни қуйидаги таркиб билан бошлади:
А. Корнейчук, А. Алиқулов, Ҳ. Каримов, Р. Бердимуродов, О. Жўрабоев, В. Афонин, А. Соро, И. Хазигалиев, А. Мерзляков, И. Таран, Ҳ. Муртазоев. Заҳирадан майдонга тушганлар: В. Клишин, Ф. Петровски, А. Жўраев, Л. Убайдуллаев, О. Каримов, Ғ. Рахмонов, А. Амонов.
Учрашувнинг иккинчи бўлимида Аббос Амоновнинг ўнг қанотдан ошириб берган тўпини Александр Мерзляков рақиб дарвозасига йўллаган бўлса, ҳимоячи Азиз Жўраевнинг аниқ пас узатишидан сўнг, Виктор Клишин “Далянь” клуби дарвозабони билан бирга-бир вазиятга чиқиб борди ва дарвозабоннинг узоқ пастги бурчагини аниқ нишонга олиб, ҳисобни 2:0га етказди. Шу тариқа, “Шўртан” жамоасининг Дубай шаҳридаги сўнгги ўртоқлик учрашувида Игорь Криушенко шогирдларининг қўллари баланд келди.
Манба: http://fcshurtan.uz
