Керимов миллионлари сабаб...
Криштиану Роналду дарғазаб. Португалияликка Самуэль Это~Онинг «Анжи»да ундан кўп маош олаётгани ёқмаяпти, чоғи. Ҳарқалай, GR7 «Реал»дан кетиши мумкинлигини «қурол» қилиб, маошини оширишларини талаб қилмоқчи.
Яъни португалиялик ярим ҳимоячи сайёрада яна энг кўп маош олувчи футболчи бўлишни истаяпти. Хуллас, Криштиану «Реал»даги ҳозирги ҳолатидан қониқмаяпти. Йўқ, Жозе Моуриньо имзосидаги ўйинда бажараётган роли учун эмас, балки ўз моянаси масаласида. Sports. es сайтининг хабар беришича, Роналду ҳозирда дунёнинг энг кўп маош олувчи футболчиси эмаслигидан хафа ва ёзда Флорентино Пересдан шахсий шартномаси бандларини қайта кўриб чиқишини талаб этмоқчи. Унинг «Қироллик клуби» билан тузган келишуви 2016 йилгача амалда бўлади ва бунинг орқасидан ҳар йили 13 млн. евро олади. «Анжи» шарафини ҳимоя қилаётган Самуэль Это~О эса 20 «лимон» топяпти. Кўринишидан, шу нарса Роналдунинг жинини қўзғатяпти. Қизиғи, камерунлик футболчи «Анжи»га ёзда ўтганди, Криштиану эса умумий ҳолатдан энди хавотирга туша бошлади. Албатта, GR7 Мадридга сайёрамизнинг энг қимматбаҳо футболчиси бўлиш учун кўчиб ўтган: «Реал» унинг трансфери учун «МЮ»га 94 млн. тўлаганди. Футболчининг ўзи «Қироллик клуби»да дарҳақиқат, анча вақт дунёдаги энг кўп маош соҳиби сифатида юрди. Бироқ Сулаймон Керимов ва унинг ажабтовур лойиҳаси GR7 обрўсига жиддий зарба берди.
Ҳа, ёзда нафақат Роналду, балки Жозе Моуриньонинг ҳам «Реал»ни тарк этиши хусусидаги гап-сўзлар бежиз тар-қалмади. Яъни Моу ҳам ҳозирги ҳолатидан унчалик мамнун эмас. Италия ОАВ хабарларига қараганда, португалиялик «Интер»ни бошқарган вақтида, маоши клубда барчаникидан баланд бўлишини талаб қилган экан. Ўшанда «нерадзурралар» сафида ўйнаган Это~О йилига 10 млн. оларди. Натижада Массимо Моратти португалиялик мураббийга 10,5 млн. евро миқдорида мояна белгилашга рози бўлганди. Тўғри, «Беназир» «Реал»га ўтгач, маоши пича пасайди (0,5 млн. еврога). Демак, у «Реал»да ишлаш учун шунча пулни қурбон қилиш арзийди, деган хулосага келган. Бироқ агарда Криштиану шартномаси янада манфаатли бўлишини талаб қилса ва бу қондирилса, Моуриньо жим қараб турмаслиги тайин. Чунончи, у ҳозирнинг ўзида шогирдидан маълум даражада оз топяпти. Иккинчи томондан, биринчи «Галактикос» даврида клубга миллионлаб қарзларни «илган» Флорентино Переснинг айтайлик, Роналду маошини кўтариб, орқасидан Моу- риньонинг қош-қовоғига қараб иш тутишига ишониш қийин. Хуллас, португалиялик юлдузли тандемнинг кетиш эҳтимоли анча юқори. Боз устига, Моуриньо Англияга қайтмоқчи эканлигини бир неча марта таъкидлаб улгурди. Роналду ҳам айнан туманли ўлкага қайтиши ҳеч гап эмас: уни Манчестерда илҳақ бўлиб кутишяпти. Савол қайси клубда: «Юнайтед»дами ёки «Сити»да?
Криштианунинг ишлари билан Португалиядаги энг йирик агентлик - Gestifute шуғулланади. «Газета. Ru» Жорже Мендеш раҳбарлигидаги агентликка шу масала юзасидан мурожаат қилганда, унинг ходимлари футболчини ўз шартномасидан қониқмаётгани хусусидаги гап-сўзларга изоҳ беришни истамадилар. Бу ҳолатда No comments иборасини ҳам тасдиқ, ҳам инкор ўрнида қабул қилиш мумкин. Айтганча, Роналдуга «Сити»дан ташқари, «ПСЖ» ҳам кўз тикяпти. Тўғри, ҳозирда «Малага» ва «Анжи»нинг қизиқишига жиддий эътибор қаратиш но-ўрин.
Испания матбуотида ёзилишича эса, «Реал» раҳбарияти футболчининг маошини 40 фоиз (тахминан 18 млн. еврога) оширишга ваъда берган. Бироқ фақат янги шартномада, яъни амалдагиси тугагач. Роналду эса 2016 йилни кутиб турмоқчи эмас ва ҳозирнинг ўзида кўпроқ олишни истайди. Мавсум якунигача ҳали вақт бор ва томонлар бу масалада бир тўхтамга келишлари ҳеч гап эмас.
Маълумот ўрнида айтиш жоиз, «Реал»нинг яна бир вакили тез орада Gestifute мижозига айланиши мумкин. Гап Марсело ҳақида кетяпти. У яқинда ўз агенти билан ҳамкорликни тўхтатди ва энди Жорже Мендеш бошқарувидаги агентлик хизматига таянмоқчи. Умуман олганда, «Реал»да Gestifute мижозлари кўпчиликни ташкил этишади. Роналдудан ташқари, Анхель Ди Мария, Пепе, Фабиу Коэнтрао, Рикарду Карвалью ва албатта, Жозе Моуриньо айнан шу агентлик билан ҳамкорлик қилишади. Барча юлдузлар Gestifuteга интилаётган эканлар, балки у ерда сеҳргарлар ишлашар? Шуни инобатга олсак, Роналдунинг якунда ўз мақсадига эришиши эҳтимоли баланд. У ҳолда Самуэль Это~О энг кўп маош олувчи футболчилар рўйхатида иккинчи ўринга тушиб қолганини айтиб, «Анжи» хўжайини Сулаймон Керимовни безовта қилмасмикин?
