Уйғон энди , «Динамо»жон....
Мухлисларинг кутар ҳамон,
Интил ғалабалар томон,
Қачон учар бизнинг кетмон,
Уйғон энди, «Динамо»жон.
Ортда юриш сенгамас хос,
Ўйин кўрсат номингга мос,
Соврин сари қадаминг бос,
Олға энди, «Динамо»жон.
Омад олиб келсин баҳор,
Мағлуб бўлма зинҳор-зинҳор,
Ғалабага айлама зор,
Уйғон энди, «Динамо»жон.
Номинг тарихларга битган,
«Жальгирис»ни мағлуб этган,
Қандай йигитларинг ўтган,
Олға энди, «Динамо»жон.
Шариф, Фарҳод, Илҳомлари,
Жаранглаган номлар бари,
Не-не юлдузлар ҳурмати,
Уйғон энди, «Динамо»жон.
Мавсум келар эшик қоқиб,
Юракларга умид ёқиб,
Қувонайлик сенга боқиб,
Олға энди, «Динамо»жон.
Буюк орзу бўлсин мадад,
Йўл бошласин оға Аҳмад,
Мухлисларинг десин раҳмат,
Уйғон энди, «Динамо»жон.
Майдонларда кўрсат кучинг,
Соврин бизга йироқ нечун,
Севган мухлисларинг учун,
Олға энди, «Динамо»жон.
Латиф Нормуродов, Ургут тумани.
