Батафсил: Орзуга айб йўқ ёки Виртуал финал

Батафсил: ТЕРМАМИЗДА ФУСУНКОР ФИНИШ,ЭНДИ НАВБАТ ОЛИМПИЯЧИЛАРИМИЗГА...

«Милан» ҳужумчиси Антони Кассано 2014 йили Бразилияда бўлиб ўтадиган жаҳон чемпионатидан сўнг фаолиятини якунлашини айтиб ўтди. «Энди бироз дам олсак бўлади. Европа чемпионати борасида кейинроқ бош қотирамиз. Келаси йили 30 ёшга тўламан. Яна уч йил юқори савияда ўйнамоқчиман. Кейин ҳаммасини якунлайман. 2014 йили 33 ёшда бўламан. Шундан сўнг бор эътиборимни оиламга қаратсам бўлади»,-деди футболчи Италия термасининг Шимолий Ирландияга қарши ўтказган учрашувидан сўнг.

Англиянинг «Арсенал»и қишки трансферлар бозори пайтида ўз таркибига «Валенсия» ярим ҳимоячиси Пабло Эрнандесни қўшиб олмоқчи. Бу ҳақда «Кадена Сер» радиоси хабар тарқатди. «Газетта делло Спорт»нинг маълумотларига ишонадиган бўлсак, «канонирлар» «Фиорентина» ярим ҳимоячиси Хуан Мануэль Варгас учун 14 миллион евро тўламоқчи эканлар.

«Барселона» ҳимоячиси Херард Пике жамоа бош мураббийи Хосеп Гвардиоланинг кетмаслигини истамоқда. Яқинда ушбу мутахассис шартномаси якунланганидан сўнг «Барса»ни тарк этиши мумкинлигига шаъма қилганди. Унинг келишуви шу мавсум охирида ниҳоясига етади. «Бизнинг «Барселона»миз футбол тарихидаги энг кучли жамоадир. Демак ҳеч нимани ўзгартиришга ҳожат йўқ. Менимча Гвардиоланинг «Барса»дан кетиши учун асос йўқ»,-деди Пике «Эль Мундо Депортиво» нашрига берган интервьюсида.

Москванинг «Локомотив» клуби «Барселона»га Александр Глеб борасида янги таклиф билан чиқмоқчи. Беларусь термаси етакчиси ҳозирда Германиянинг «Вольфсбург» жамоасида ижарада ўйнамоқда. Ўзингизга маълум, «темирйўлчилар» 30 ёшли ярим ҳимоячини шу ёзда сотиб олмоқчи бўлишганди. Энди эса бу ишни январда амалга оширмоқчилар.

Швеция термасининг собиқ устози Ларс Лагербак Исландия миллий жамоасига бош мураббий этиб та¬йинланди. 63 ёшли мутахассис янги ишга 2012 йилнинг январидан киришади. Эслатиб ўтамиз, Лагербак ЖЧ-2010 пайтида Нигерия термасини бошқарди. Ундан олдин эса деярли 10 йил давомида Швеция термасига устозлик қилган.