Анвар Бердиев: «Ал Шабаб»га осон бўлмайди»
«Нефтчи»да тажрибали легионер ўйинчилар йўқ. Юрий Саркисян асосан маҳаллий футболчиларга таяниб келган ва бу одатидан ҳеч қачон воз кечмайди. Албатта, жамоада маҳоратли футболчилар ҳам бор ва булар асосий фигурани ташкил қилишади. Бу боарда ҳужумчи Анвар Бердиевни алоҳида тилга олиб ўтиш керак. 12 йилдан бери «Нефтчи»да тўп суриб келаётган футболчи жамоанинг етакчи ўйинчиси саналади. Табиийки, «Ал Шабаб» билан ўтадиган плей-офф баҳсида ушбу футболчининг зиммасига катта масъулият юкланади. Лекин бу ҳужумчи фаолияти давомида кўплаб муҳим ўйинларда ва Осиёнинг етакчи клубларига қарши ўйнаб етарли тажриба тўплаган.
- Бу борадаги тайёргарлимиз бир маромда кечмоқда. Биласиз, бунгача 20 кун давомида Дубайда ўқув-машғулот йиғинларини ўтказиб келдик. Ундан кейин Фарғонада анаънавий тарзда ўтказиб келинадиган Ҳоки Кубогида қатнашиб ўйин амалиётимизни янада яхшилаб олдик деб ўйлайман. Тайёргарлигимиздан нолимасак бўлади, ҳаммаси яхши!
- Юрий Саркисян Дубайдаги йиғиндан фойдаланиб «Ал Шабаб»нинг битта учрашувини бевосита стадионда кузатди. Бўлажак рақиб сизларда ҳам қизиқиш уйғотдими?
- Ҳа, биз ҳам «Ал Шабаб» ҳақида қизиқдик. Лекин асосий эътиборимиз машғулотларга қаратилганди. Чунки бу бизнинг вазифамиз. Рақиб жамоани ўрганиш эса мураббийларнинг иши ҳисобланади.
- Нима бўлган тақдирда ҳам «Нефтчи» бу йил халқаро аренада қатнашади. Агар омади кулиб боқса, ОЧЛда ёки ОФКда иштирок этасизлар. Бу ҳолат плей-офф ўйинидан олдин жамоа аъзоларида бироз бўлса-да, хотиржамлик ҳиссини уйғотмаяптими?
- Аниқ айтаманки, жамоамизда ҳеч ким ҳотиржам эмас. Ҳозир айтдим, «Ал Шабаб»га қарши беллашувга пухта тайёргарлик кўряпмиз. У ерга Ўзбекистон шарафини муносиб ҳимоя қилишга бор кучимиз билан ҳаракат қиламиз. Ҳаммамиз ҳам Осиё чемпионлар Лигасида ўйнашни хоҳлаяпмиз. Лекин плейй-офф битта ўйиндан иборат бўлади. Агар бу учрашув Фарғонада ўтказилганида бемалол ОЧЛда иштирок этамиз деб айтишим мумкин эди. Бироқ истаймизми-йўқми, сафардаги учрашув барибир қийин бўлади. Шунга қарамасдан бор кучимиз билан ўйнаб, охиригача курашамиз. Мезбонларга сира ҳам осон бўлмайди.
- «Ал Шабаб» билан ўйин Дубайда бўлиб ўтади. Бунгача эса у ерда ўқув-машғулот йиғинини ўтказдинглар. Буни ҳисобга олганда, у ернинг об-ҳавосига кўникиш қийин бўлмаса керак?
- Қаерга боришингиздан қатъий назар 5 ёки 10 кун ўша жойга мослашиш жараёни давом этади. Тўғри, Дубайда 20 кун давомида шуғулландик. У ерга борганимиздан кейин 4-5 кун ўтгач иқлимга мослашдик. Ҳозир эса яна ўз юртимиздамиз ва ўзимизнинг об-ҳавога мослашганмиз. Менимча яна Дубайнинг муҳитига, иқлимига кўникиш қийинроқ бўлади деб ўйлайман. Лекин бу ҳеч қандай баҳона эмас. Биз қўлимиздан келганича ғалаба қозонишга ҳаракат қиламиз.
- «Нефтчи» заявкасига назар ташласак, асосан ёшларга эътибор берилмоқда. Уларнинг орасида эса сизнинг зиммангизга катта масъулият юкланишини яхши биламиз.
- Бизда Шукур Пўлатов, Сардор Мирзаев, Ойбек Нурбоев, Отабек Исроилов ва яна бир қатор иқтидорли ўйинчилар бор. Улар бир-икки йилдан бери ўйнаб «Нефтчи»нинг асосий таркиб футболчиларига айланишган. Улар бемалол халқаро майдонларда ҳам жамоамизга ёрдам бера олишади. Булардан ташқари яна бошқа ёшлар ҳам етишиб чиқмоқда ва улар ҳам «Нефтчи»га ёрдам бериш учун қўлидан келганича ҳаракат қилишяпти. Машғулотларда барча ўйинчилар тер тўкиб ишлашяпти. Насиб қилса, бу албатта ўз мевасини беради деб умид қиламан.
- «Нефтчи»нинг совриндорлар қаторидан жой олишига барча кўникиб қолганди. Бироқ охирги йилларда жамоада бироз пасайиш кузатилди ва бу авлодлар алмашинуви билан боғлиқ дея изоҳланди. Ҳозирга келиб ўша жараён ўтиб бўлди деб ҳисобласак бўладими?
- Йигитлар 3-4 йилдан бери бир-бири билан бирга ўйнаб келишяпти. Шуни ҳисобга олганда, авлодлар алмашинуви ўтиб бўлди десак бўлади. Янги мавсумда совринли ўринлар учун кураш олиб борамиз.
- Жамоани бир қатор асосий футболчилар тарк этишди. Масалан, истеъдодли ҳимоячи Ислом Тўхтахўжаев ҳам «Нефтчи» билан хайрлашди. Уларнинг кетиши клуб учун катта йўқотишми?
- Тўхтахўжаевнинг кетиши «Нефтчи» учун катта йўқотиш бўлиши мумкин. Ўзинги биласиз, Юрий Саркисян четдан ўйинчи олиб келишни ёқтирмайди. Умуман, нафақат Тўхтахўжаев балки, Алишер Ҳолиқов, Асқар Муҳитдинов, Юрий Цойнинг жамоада ўз ўрни бор эди. Лекин бундай ишларни муҳокама қилиш менинг зиммамга кирмайди. Ўринбосарларимиз таркибида кўплаб истеъдодли ўйинчилар етишиб чиқмоқда. Устозимиз уларнинг ўрнига муносиб ўринбосарларни тайрлаяпти.
- Тўғри, Юрий Саркисян легионерлар хизматидан фойдаланмайди. Лекин майдонда мураббий эмас, футболчилар тўп суришади. Айтингчи, қачондир ўйин мобайнида бизга легионер ўйинчи керак деган фикрга борганмисиз?
- Майдонда ҳеч қачон бундай фикр ҳаёлимга келмаган. Фарғонада 12 йилдан бери ўйнаб келяпман ва легионерлар бўлмаганли сабабли улар билан тўп суришни тасаввур ҳам қила олмайман.
- Қашқадарёлик бўлганингиз учун даставвал «Машъал»да тўп сургансиз. Лекин фаолиятингизнинг асосий қисмини «Нефтчи» жамоаси учун ўтказиб келяпсиз. Бу нима билан боғлиқ?
- 2000 йили «Насаф»дан «Нефтчи»га ўтганман. 2003 йили эса хабарингиз бўлса керак, мен оғир жароҳат олганман. Ўшанда Юрий Саркисян мени ташлаб қўймасдан қўлидан келган барча ёрдамини берганди. Мен эса яна оёққа туриб ўйнашни бошласам, «Нефтчи»га қанча керак бўлсам, шунча тўп суриб ёрдам бераман дея ният қилганман. Ҳозир эса яна фаолиятимни давом эттиряпман ва бу мен учун катта бахт.
- Ҳамма сизни маҳоратли ҳужумчи сифатида эътироф этади. Шу боис четда ўйнашингизни кутганлар ҳам бўлган. Умуман, легионер сифатида тўп суриш имконияти бўлганми?
- Тўғрисини айтсам, менда хорижда ўйнаш истаги бўлмаган. Чунки ўзимизнинг чемпионат қизиқарли ўтаётгани сабабли бу каби орзуларга берилмаганман. Ҳозирга келиб эса кўпчилик ўйинчиларнинг агенти бор. Олдин эса ундай эмасди. Қолаверса, «Нефтчи» совринли ўринларни қўлга киритиб келарди. Бундай жамоа шарафини ҳимоя қилаётганим эса мен учун катта бахт эди.
- Айтиб ўтганимдек, 2003 йилги оғир жароҳатдан сўнг менга берилган эътиборни кўриб «Нефтчи»дан кетасан демагунича ўйнайман деб қарор қилганман. Шу боис бошқа жамоалардан таклифларни кўриб ҳам чиқмаганман. Чунки, бунга хоҳишим ҳам бўлмаган. Шундай мураббийлар борки, агар ўйинчи мен каби жароҳатга учраса, уни ўз ҳолига ташлаб қўядилар. Саломат бўлмасангиз, ҳаттоки сиз билан гаплашгиси ҳам келмайди. Жароҳат олиб шифохонада ётганимда Юрий Вазгенович ҳар куни кечки пайт ёнимга келиб руҳан далда бериб турарди. Шу сабабли бошқа клубда ўйнаш ҳаёлимга келмаган.
- Йўқ. Ҳаммаси Худодан. Пешонамга шу нарса ёзилган экан, ундан қочиб қутула олмайман. Очиғи, бу нарса ёдимдан чиқиб кетган. Оғир жароҳатга учраганимда мени операция қилган шифокорлар ва бошқалардан энди футбол ўйнай олмайди деганини ўзим эшитганман. Лекин ўшандан кейин яна футболга қайтиб ўйнаётганим мен учун катта омад ва бахт! Жароҳатдан қутулгач бир йил оёққа туришим учун вақт кетган. Орадан бир ярим йил ўтганидан кейин кўричагим ёрилиб кетди ва яна операция столига ётдим. Лекин Худога шукурки, яна олдинги ҳолатимга қайтдим ва жамоадошларимдан қолишмасликка, улар билан тенгма-тенг ўйнашга ҳаракат қиляпман.
- Сизнинг ҳолатингизга тушиб қолган футболчидан катта ирода талаб қилинади. Чунки руҳий тушкунликни енгиб ўтиш қийин кечади. Ўшанда яна футболга қайтиш учун ўзингизда қандай ирода, куч топгансиз?
- 2003 йили жароҳат олган бўлсам, ўшанда ҳали футбол ўйнаб мириқиб тўймагандим. Тўғри, жароҳатни енгиб ўтиш жуда оғир бўлган. Соғайиб энди-энди ўйнаганимда менга жуда қийин эди. Қийинчиликнинг орқасидан майдонга қайтиб шуни билдимки, бу борада футболчига катта ирода керак экан.
- Худо менга қанча куч-қувват берса шунча ўйнамоқчиман. Лекин ҳозирча фаолиятимни тугатиш ҳақида ўйлаётганим йўқ. Лекин «Нефтчи»да футболни тугатсам мен учун яхши. Аммо ҳозирча кучим бор экан, ўйнашда давом этаман. Қолаверса, бизда ёш иқтидорли ўйинчилар жуда кўп. Уларни ўз укаларимдек кўраман.
- Ҳужумчи бўлганингиз туфайли мухлислар сиздан ҳамиша гол кутишади. Айтингчи, ҳар мавсумдан аввал тўпурарликка бўлган иштиёқингиз ошадими?
- Майдонга чиқиб гол урсангиз, ўшандагина ҳамма сизни ҳужумчи деб ҳисоблайди. Тўғрисини айтсам, мен учун биринчи навбатда жамоанинг манфаати устун туради. Иккита гол урдим-у, аммо биз 2:3 ҳисобида ютқаздик. Ундан кўра голни бошқаси киритсин, лекин 1:0 натижаси билан ғалаба қозонсак шу мен учун ширин туюлади. Бироқ ҳужумчи бўлгач, қўлидан келганича ўзини кўрсатиши керак, барибир. Унинг қандай савиядаги ҳужумчи эканлиги эса голлари билан намоён бўлади.
- Охирги пайтларда ҳужумчиларимиз у қадар кўп тўп киритишмаяпти. Масалан, ўтган йили легионер футболчи Милош Трифунович тўпурар бўлди. Ундан аввал эса Носир Отақўзиев билан Алишер Ҳолиқов атиги 13та тўп билан бошқаларни ортда қолдиришган. Бу ҳужумчиларимизнинг активлиги пасайиб бораётганидан дарак эмасми?
- Олдинлари миллий чемпионатимизда жамоалар сони 18та эди. Табиийки, ўйинлар ҳам шунга яраша кўп бўларди. Ҳозирда эса 14та клуб қатнашяпти ва голлар сони ҳам пасайиши турган гап. Аввал Умид Исоқов, Баҳтиёр Ҳамидуллаев, Жаъфар Ирисметов, Шуҳрат Мирҳолдиршаевга ўхшаган ҳужумчилар кўплаб гол уришарди ва тўпурарлар рўйхатида қизғин кураш кечарди. Менимча клубларимиз сонининг камлиги ҳам сабаб бўлмоқда. Бундан ташқари иккинчи давра охирларига бориб футболчилар толиқиб қолишяпти.
- «Пахтакор»даги Фарҳод Тожиев ўзини жуда яхши томондан кўрсатиб келаётганди. Аммо жароҳатидан сўнг аввалги ўйинини кўрсатиши бироз қийин кечяпти. У терма жамоа таркибида Қатар дарвозасига учта тўп киритганини кўрганман ва ўшанда унга юқори баҳо берганман. Бундан бошқа ҳужумчиларга унчалик эътибор берганим йўқ. Футболчиларга жароҳатдан сўнг спорт формасини тиклаш ўта қийин. Буни бошимдан ўтказиб кўрганман.
- Анвар ака, айримлар чемпионатимиз савиясини борган сари ошаётгани ҳақида гапиришса, яна айримлари бунинг аксини билдирадилар. Тажрибали ўйинчи сифатида бунга нима деган бўлардингиз?
- Чемпионатимиз савияси олдин кучлироқ эди деб ўйлайман. Ҳар бир жамоада бир қатор етакчи футболчилар бўларди. Ҳозир «Бундёкор», «Пахтакор», «Насаф» ва «Нефтчи» совринли ўринлар учун курашиб келяпти. Қолган клубларнинг савияси эса бир хил. Лекин футболимиз савиясини ошириш учун раҳбарият жуда кўп ишларни амалга оширяпти. Терма жамоаларимиз ажойиб ўйинлари билан мухлисларимизни қувонтиришяпти. Бундан мен ҳам хурсандман.
- Осиё чемпионлар Лигаси доирасида ўз майдонимизда Қатарнинг «Ал Садд» жамоасини қабул қилиб 2:1 ҳисобида ғалаба қозонганмиз. Ўшанда мен оғир жароҳатдан энди қутулиб майдонга қайтгандим. Акмал Холматов менга қанотдан ажойиб пас узатган ва уни қайчи услубида рақиб дарвозасига киритганман. Ўша голимнинг энг чиройлиси деб ҳисоблайман.
- Жамоа жуда иноқ эди. Тўғри, ҳозир ҳам шундай. Акмал Холматов, Умид Исоқов, Сергей Ни, ака-ука Тоировлар билан гаплашганимизда албатта ўша дамларни мароқ билан эслаймиз.
