Душан Савич: Демьяненко — яхши мураббий ва яхши инсон
Анатолий Демьненко мураббийлик қилаётган "Волинь" клуби ўз сафида "Пахтакор"нинг собиқ футболчиси Душан Савични қўшиб олганидан хабарингиз бор. У жамоасининг сўнгги назорат ўйинда рақиб дарвозасига 4та гол уришга муваффақ бўлди.
— Душан, сўнгги спарринг-баҳсда "Лудогорец" дарвозасига "Волинь" 6та гол урди ва сиз "покер"га эришдингиз. Рақиб шунчалик кучсиз эдими?
— "Лудогорец" ўз сафида индивидуал жиҳатдан кучли футболчиларга эга, аммо бу кеча майдонда фақат битта жамоа ўйнади — "Волинь". Бу натижа — тинимсиз меҳнатларимизнинг самараси.
— Македония ОАВларининг ёзишича, сиз "Волинь" билан шартнома имзолабсиз. Бу ростми?
— Клуб билан келишиб олганимиз рост. Шартномани расман бир неча кундан кейин имзолаймиз.
— Клубдаги илк таассуротларингиз қандай?
— Ҳозирча ижобий. Жамоада ажойиб йигитлар йиғилган ва улар мени яхши қарши олишди. Самарали меҳнат қилиш учун жамоада яхши муҳит ҳукмронлик қилмоқда.
— Мураббий билан тез тил топишиб кетдингизми?
— Ҳа, биз профессионаллармиз. Демьяненко яхши мураббий бўлишдан ташқари, яхши инсон ҳам. У ҳар бир футболчининг кўнглига йўл топишга ҳаракат қилади.
— Тил муаммоси халал бермаяптими?
— Бундай муаммони ҳис қилмаяпман. Мен рус ва инглиз тилларида сўзлаша оламан.
— Украина чемпионати ҳақида аввал эшитганмисиз?
— Терма жамоадаги шерикларим Украина чемпионати ва клубларининг Еврокубоклардаги иштироки ҳақида гапиришганди. Очиғини айтсам, Украина чемпионатида дебют қилишга шошиляпман.
— "Волинь" ҳужум чизиғида рақобат ҳазилакам эмас...
— Бу мени чўчитмайди. Аксинча қўшимча мотивация машғулотлар жараёнида ёрдам беради. "Волинь"нинг асосий таркибидан жой эгаллашга ва мухлисларни голларим билан хурсанд қилишга ҳаракат қиламан.
— "Волинь"га ўтишингизга миллий терма жамоага қайтиш учун яхши вариант сифатида қараяпсизми?
— Албатта, клубга ўтишимнинг асосий сабабларидан бири шу. "Волинь"даги ўйинларим орқали Македония терма жамоаси бош мураббийининг ҳам ишончини қозонаман, деган умиддаман.
