Улуғбек Бақоев: УЕФАда бўлганимизда барчанинг қонини «ичардик»
Қозоғистоннинг Sports.kz веб-сайти 2011 йил бошида "Олмос" соврини ташкил қилганди. Ушбу танлов ойма-ой ўтказиб келинди ва йил якунларига кўра ғолибликни ҳамюртимиз Улуғбек Бақоев қўлга киритди. Сайт ходимлари танлов ғолиби билан интервью уюштиришди.
— Қозоғистон жамоаларнинг бош мураббийлари ва футболчилари сизни Премьер-лиганинг энг яхши футболчиси деб топишди. Бу билан сизни табриклаймиз.
— Очиғини айтсам, кутмагандим. Ёқимли кутилмаган ҳол. Мен чемпионатнинг сўнгги 2 турида иштирок этмагандим ва шунинг учун бу ҳақда ўйламагандим. Бу ёлғиз менинг эмас, бутун "Жетису" жамоанинг ютуғи, деб ўйлайман.
— Сизни табриклашдими?
— Ҳа, кимдир қўнғироқ қилган бўлса, кимдир скайп орқали табриклади. Футболчилардан Андрей Харабара, Аза Нургалиев ва Серёга Скорих табриклашди.
— Ўтган чемпионатнинг энг яхши футболчиси сифатида кимни тан олган бўлардингиз?
— Мен битта номзодни айта олмайман. Эмиль Кенживариев ва Нурбол Жумаскалиев мавсумни яхши ўтказишди.
— Соғлиғингиз билан муаммолар бор эди. Ўзингизни қандай ҳис қиляпсиз?
— Бурнимни операция қилдириш учун бугун Бухородан Тошкентга учиб келдим. Ҳаммаси яхши ўтди, ўзимга келдим. Кечадан бошлаб мустақил шуғуллана бошладим, кросс югуряпман. "Иртиш"нинг февраль ойининг иккинчи ярмидан бошланадиган навбатдаги йиғинидан бошлаб жамоа сафига қўшиламан.
— Шартнома имзоладингизми?
— Ҳа, икки йиллик шартномага имзо чекдим.
— Амирликдан кетишингизнинг асосий сабаби нимада?
— Биринчидан, ўйиним қовушмади, иккинчидан тил муаммоси ва ўйин услуби. У ерда бошқача футбол ўйналади. Индивидуал ўйин десак бўлади.
— Сиз Қозоғистон чемпионатида 89та гол ургансиз. Уни юзтага етказиш ниятингиз борми?
— Умид қиламан, янги жамоага тезда мослашиб олишимга жамоадоошларим ёрдам беришади ва мен ўз ишимни қилишни — гол уришни бошлайман. Барчаси жойида бўлса, балки ушбу мавсумда мазкур маррадан ўта оламан.
— Февраль ойининг сўнгида Японияга қарши қийин ўйин кутиб турибди.
— Ҳар иккала жамоа тўртинчи босқич йўлланмасини ҳал қилиб улгурган бўлса-да, бу принципиал ўйин бўлади. Гуруҳда биринчи ўринни эгаллаш учун иштиёқ кучли. Бизнинг энг асосий мақсадимиз — ЖЧнинг финал босқичи йўлланмасини қўлга киритиш.
— Ўзбекистон УЕФАда иштирок этганидан қандай натижаларга эришиши мумкин эди?
— Ўзбекистон билан ўйинларда хоҳ уйда бўлсин, хоҳ сафарда, ҳеч кимга осон бўлмасди, деб ўйлайман. Аниқ биламан, биз очколарни ҳеч кимга шунчаки бериб қўймасдик. Албатта, қандай ўринларга эгаллашимиз ҳақида бирор нарса дейиш қийин, аммо барчанинг қонини ичардик.
— Ушбу мавсумда нималарга умид қиляпсиз?
— Ҳар бир ўйинга бир мақсад билан чиқиш керак — ғалаба қозониш. Кейинчалик эса қандай ўринлар учун курашишимиз мумкинлиги кўринади. Умуман олганда, кучли учликка киришни истардим.
— Ушбу учликка кириш учун қайси жамоалар даъвогарлик қилади, деб ўйлайсиз?
— Ўйлашимча, 7-8та жамоа даъвогарлик қилади. Улар — "Астана", "Шахтёр", "Иртиш", "Тобол", "Жетису", шунингдек, "Ордабаси", "Қайрат"ни ҳисобдан чиқариш керак эмас. Балки "Актобе" ҳам бизни ҳайрон қолдирар. Қайсидир битта жамоа ҳайрон қолдириши аниқ. Қайсилигини билмайман.
